Gehele dictee zoals deelnemers ervaren hebben, voorgelezen door Jan Janssen. Maak zelf het dictee!
Klik hier om te luisteren
(Duur: 50 min / Datum: 22 april '06)
Correcte spelling van Mestreechs dictee 2006:
Wie Zjengske Zjeng woort.
Sinds d’n tied tot Zjengske de kweeksjaol, die in dat aajd kloester aon de Breusselseweeg te vinde is, aof heet, tröf heer zien aw sjaolkammeraote eine kier in ‘t jaor.
Deze kier höbbe ze in d’n Dikke Dragonder aofgesproke. Eder jaor weurt e steveg pötsje beer umgestoete en koume aw verhaole bove, die mèt ’t jaor sterker weure.
Zjengske rappeleert de aandere aon ’t verhaol tot heer zien väörtan heet verlore wie heer verbergemenneke aon ’t speule waor. Dat höbbe ze ziech evels al mennege kier mote aonhure. Aof en touw heet ’t get eweg vaan ‘n competitie in sterke verhaole tösse al die kammeraote vaan vreuger.
Väöl vaan de sjaolmeisters höbbe dit jaor de stadspercessie gezeen. ’t Waor ei baar prach en praol dee oonder ‘n straolende zon te zien waor. D’n deke, dee veur d’n hiemel leep, had nog ’t mieste bekieks gehad.
Heer droog ’n zwarte bonnèt mèt ’n maof flojs. Es keplaon vaan de paus maag heer naomelek ’t klein mauve drage.
Zjengske dee ziech allewijl meister Zjeng neump, steit al ’n aontal jaore veur de klas. Noe oondervint heer persoenelek wie heer ziech vreuger in de klas gedroog. Meisters en juffrouwe die neet mie veur de klas stoon, kinne dao netuurlek ouch ’n partij euver mètbloze.
‘ne Collega vaan Zjeng vertèlt tot ein vaan zien lierlinge pas geleie ’n spreekbeurt heet gehawwe euver ‘ne pappegej. Dat bies kós Mestreechs.
‘t Reep wäörd es: dikke madzjel, mager sjroet, lekkeren doedej, gek flaatsje, grieniezer, kluteklaos, kuimkoont, aw taatsj, speimei, zweitlanseer, vèswief en jenkpluim.
Es gooje meister zörg Zjeng mèt regelmaot veur ‘t nudeg hoeswerk. Lès móste de kinder ’n opstèl make euver de maquèt vaan Mestreech die te beziechtege is in de hal vaan Centre Céramique. Mèt dat opstèl waor e sjoen ciefer te verdene veur ’t puntebeukske.
Zjeng gief aof en touw ouch e Mestreechs dictee um zoe de Mestreechter taol oonder de jonglui leventeg te hawwe.
(einde)
